२१ माघ, काठमाडौं । अपहरणमा परेका नेपाली व्यवसायी गंगाविसन राठीको भारतमा शव भेटिएको घटना लगत्तै अपहरणमा परेका भारतीय नागरिकलाई नेपाल प्रहरीले मुक्त गराएको छ । बुधबार अपहरणमा परेका भारत मोतीहारीका राकेश रञ्जन सिंहलाई बारा प्रहरीले आइतबार बिहान बाराको पथरहट्टीबाट अपहरणमुक्त गराएको हो ।

स्थानीय एक घरमा बन्धक बनाएर राखेको अवस्थामा सिंहलाई अपहरणमुक्त गराइएको बारा प्रहरीले जनाएको छ । ज्वाइन्ट अपरेशन अन्तर्गत परिचालित सशस्त्र प्रहरी र नेपाल प्रहरीको संयुक्त टोलीले सिंहलाई उद्दार गरेको हो ।

अपहरणमा संलग्न बारा पथरहटटीका ७० वषिर्य जनक सहनी, २३ वषिर्य पन्चलाल सहनी, पर्सा मसीहानीका ३३ वषिर्य शेषनाथ राउत कुर्मी र भारत रक्सौलका दिनानाथ दास तत्वा पक्राउ परेका छन् । प्रहरीले घटनास्थलबाट हतियार र मोटरसाइकल समेत बरामद गरेको छ ।

स्मरणरहोस पुस २७ गतेदेखि बेपत्ता नेपाली व्यवसायी गंगाविसन राठीको शव भारतको पश्चिम बंगालमा शनिबार भेटिएको थियो । राठीको अपहरणमा संलग्न रहेको अभियोगमा दुईजना भारतीय नागरिक यसअघि नै पक्राउ परेका छन् ।