४ सन्तानकी आमाले छोरा ‘बन्धक’ राखेर दोस्रो विहे

१६ पुस, चितवन । प्रेमले सानो-ठूलो, धनी-गरिब, तन्नेरी-वृद्ध, विवाहित-अविवाहित अनि पराई-इष्टमित्र भन्दैन् । गरिबीले प्रेमलाई छेक्दो रहेनछ । आफुले जन्माएको छोरा बन्ध राखेर महिलाले अर्को बिहे गर्छिन भन्ने सुन्दा अनौठो लाग्न सक्छ । यस्तै उदेकलाग्दो महिलाको प्रेमले चितवनको कोरकमा अहिले चर्चा पाएको छ ।
चालीस कटेकी र चार छोराछोरीकी आमाले दोस्रो बिहेका लागि आफ्ना छोरा बन्धक राखेर भागिन् । श्रीमती र्फकने आसमा उनका श्रीमान् घर कुरेर बसिरहेका छन् । कोराक ६ नौलापुरकी ४१ बर्षकी लालीमाया ९ बर्षको छोरा २ हजारमा बन्धक राखेर गाउँकै ५० बर्षका रेशमलालसँग भागेकी हुन् । तीन छोराछोरीका बाबुसँग उनले दोस्रो बिहे गरेकी हुन् । उनीहरु नातामा देवर भाउजु पर्छन् । खैरहनी गाविसस्थित पूर्वपश्चिम राजमार्गको एक चौधरीको घरमा कान्छो छोरा समुन्द्रलाई बन्धक राखेपछि २ हजार सापट पैसा उठाएर उनले दोस्रो बिबाह गरेको खबर कान्तिपुर दैनिकले खबर छापेको छ ।
पहिलेका श्रीमान् ६० बर्षका युगरामले भने ‘श्रीमती र्फकने आसमा छु, छोराछोरीको मायाले आउँछिन् भन्ने लाग्छ ।’उनले श्रीमतीलाई माया गर्न छाडेका छैनन् । चेपाङ परम्पराअनुसार विहे गरेका उनीहरुका तीन छोरा र एक छोरी छन् ।

Labels: News